Почина Гоце Волчески

Со неизмерна тага и болка во душата соопштуваме дека на 27 мај 2017 година почина нашиот сопруг, татко и дедо, човекот кого најмногу го сакавме и почитувавме и на кого сме му вечно благодарни за сé што направи за сите нас.

„Смртта не е ништо страшно. Замисли дека сум во другата соба, дека сум излегол од задната врата. Не се плаши. Сé ќе помине. Ти ќе си бидеш пак ти истата, јас ќе сум ти пак татко горд, само од подалеку. Тука сум. 

Не плачи. Не можеме да ја победиме смртта, но понекогаш можеме да го победиме она што не убива додека живееме. Не биди ситна душа. Всушност, не можеш да си таква. Ти си мое дете, мој ген. Не пливаш во исто корито како сите. Гледај си ги дечињата, биди како нив. Секогаш купувај си и за себе киндер јајце. Биди добар човек, без оглед колку е темно.

Решавај. Испробувај. Живеј. Времето е она што го бркаат сите. Не брзај, земи воздух. Забележи ги детелинките и пеперутките што толку те интересираа кога беше мала. Ќе дојдат моменти кога ќе посакаш да се ничкосаш и да останеш на земја, зошто многу се собрало во душата, зошто е многу тешко да се изнесе гневот или тагата или туѓата малодушност надвор од себе. Остани мирна. Јас ќе ти бидам ветер во грбот.

Не ги затварај очите кога ме мислиш, ами отвори ги широко, како дух исполнет со живот. Тука сум. Те чувам. Стражарам. Не се грижи што не можеш да ме видиш. Ќе ме познаеш.  Сеќавај се на мене и биди среќна. Твојата насмевка е мојот мир“....Во спомен на татко ми Гоце