Како што се наближува 8 април, денот на парламентарните избори во Унгарија, премиерот Виктор Орбан сè позовриено се расфрла со националистички пароли, не штедејќи навредливи зборови за опонентите во земјата, но и во странство. Последниве недели во своите говори тој сè пожестоко ги повторува тезите кои многумина ги оценуваат како изразито националистички и расистички.
Пред некој ден, обраќајќи и се на нацијата, тој во преден план ја стави Унгарија како „последен бастион на Европа кој се бори против пропажањето на христијанската култура и ширењето на исламот".

Оценувајќи ја „состојбата на нацијата“, Орбан по којзнае кој пат повтори дека Унгарија, со изградбата на оградата во текот на мигрантската криза во 2015 година „го спречила муслиманскиот свет да ја преплави од југ". Тој нагласи дека Унгарија е „последна земја на латинското западно христијанство" кој цврсто се држи и чиишто одбранбени бедеми се доволни да го задржат најголемиот наплив на мигранти. Орбан додаде дека и православните христијани решително се борат како и Унгарија, оддавајќи им признание на Бугарија, Романија и Србија. Но, рече Орбан, сега на Унгарија и се заканува иста опасност и од Запад, при што средиштето на тие напади го лоцира во Брисел, но и во Берлин и Париз, кои, како што рече „сакаат да ја прифатиме нивната политика за ширење на исламот".

„Се наоѓаме на прагот на победата", рече Орбан подвлекувајќи дека членките на Вишеградската група (Унгарија, Полска, Чешка и Словачка) остануваат непоколебливи, а дека и Австрија се сврти во таа насока и дека и во Баварска под водството на ЦСУ се развил духовен и политички отпор. Вишна на шлагот на Орбановиот „запален" говор секако е неговото, како што рече, желно исчекување на италијанските избори, на кои, ќе се направи пресврт и ќе се врати владата на здравиот разум и на италијанскиот национален и културен идентитет и ќе се врати Силвио Берлускони. Очекувањето на враќањето на Берлускони Орбан го проследи со извикот: Форца Италија!
Орбан не ја пропушти приликата да потсети на европските политичари, негови колеги, кои потклекнале пред неговата решителност. Тој изврши куса прозивка, спомнувајќи по име и презиме австриските нацелари Фајман и Керн, италијанскиот премиер Ренци, Хрватот Милановиќ, како и Мартин Шулц, за кого рече дека „манијакално сакал да стане сè и на крајот станал ништо". Овој список не е конечен, рече Орбан.

Инаку, последните испитувања на јавното мислење говорат дека Орган има поддршка од 52% од бирачите и ако остане така, тој би освоил трет последователен, а вкупно четврти премиерски мандат.