Од движењето Беса денеска реагираа на годишната програма за поддршка на културата, за која велат дека уште еднаш потврдила оти финансиските средства кои со години наназад требало да им бидат доделувани на промоторите на албанската традиција, уметност, книга и култура и понатаму продолжуваат да завршуваат во џебовите на семејствата на владините претставници.

„Оваа практика дополнително ја продлабочува дискриминацијата, која, освен од страна на државниот систем, продолжува и од страна на незаситените албански функционери“, велат од Беса.

Беса смета дека се потврдуваат нивните предупредувања дека не може да има реформаторска влада со криминогени елементи наследени од претходната.

„Кој знае, можеби и новите владини претставници како модел за функционирање ги имаат земено корумпираните функционери на претходниот режим, дел од кои ги имаат и за колеги“, соопшти Беса.

Движењето го повика министерот за култура Роберт Алаѓозовски, ако сака да докаже дека се разликува од поранешните министри за култура, да ја откаже програмата и да се извини што некој повторно интервенирал за дискриминација на албанската култура.