Претседавачот на Собранието на Стопанската комора, Антони Пешев, денеска во Лондон,учествуваше на Инвестицискиот самит за Западен Балкан, организиран од Европската банка за обнова и развој (ЕБОР), на кој пред шесте премиери од регионот, претставници од финансиски институции и водечки меѓународни компании, беше презентиран првиот заеднички производ на Коморскиот инвестициски форум - „Регионалната инвестициска платформа“.

„Регионалната инвестициска платформа“ за Западен Балкан, како инструмент наменет за инвеститорите заинтересирани за регионот, е подготвена од Коморскиот инвестициски форум, кој е основан од Стопанската комора на Македонија заедно со Унијата на стопански комори на Албанија, Комората за надворешна трговија на Босна и Херцеговина, Стопанската комора на Црна Гора, Стопанската комора на Србија и Стопанската комора на Косово.

Претседателот на ЕБОР, господинот Сума Чакрабарти, посочи дека платформата има потенцијал да стане незаменлива алатка за странските инвеститори и за бизнис-заедницата во регионот на Западен Балкан, како и дека самиот Коморски инвестициски форум е одлична иницијатива, која е силен израз на стабилноста на регионот.

Целта на инвестициската платформа која настана на иницијатива на приватниот сектор со поддршка на Европската банка за обнова и развој (ЕБОР), е да го промовира регионот како единствена дестинација за инвестиции и за започнување бизнис, како и да ги презентира предностите за воспоставување заеднички регионален пазар, при што на бизнис заедницата ќе и` бидат достапни сите информации поврзани со условите и поволностите за инвестирање.

Платформата ќе овозможи потенцијалните инвеститори од регионот и пошироко да имаат пристап до база на податоци за макроекономските показатели, правната рамка, пазарот, финансиските и други стимулации, потенцијалните партнери и добавувачи, како и конкретни проекти во кои може да го вложат својот капитал. Истата се очекува да придонесе за унапредување на инвестициската клима и водењето бизнис во регионот, поголема транспарентност на економиите и креирање услови за побрз економски раст и развој.

Платформата ќе биде и корисна алатка за коморите - членки на Коморскиот инвестициски форум во однос на креирањето препораки за доносителите на одлуки и покренувањето иницијативи за отстранување на препреките за деловното работење, усогласување на прописите, процедурите и практиките за поефикасно работење на компаниите од регионот и пошироко.